photo of វិសាខា
កែវ សុខផេង និង​ សុខ សុវណ្ណា ទៅ​ចូល​រួម​​ក្លិប​ចំណូល​ថ្មី វិសាខា

ទីបំផុតកីឡាករឆ្នើមរបស់ក្រុមជម្រើសជាតិកម្ពុជា កែវ សុខផេង និង កីឡាករ សុខ សុវណ្ណ បានរកទ្រនំថ្មី ដើម្បីបន្ដអាជីពលើវាលស្មៅបានហើយ គឺពួកគេ បាន​ចូលរួម​ជាមួយ​ក្រុមចំណូលថ្មីវិសាខា ។​ នេះបើយោងតាមការធ្វើសន្និសីទសារព័ត៌មានបង្ហាញសមាជិកថ្មីរបស់ក្លឹបវិសាខា នារសៀលថ្ងៃពុធនេះ។

កែវ សុខផេង ​បាន​ចាកចេញ​ពី​ក្រុម​ភ្នំពេញ​ក្រោន ​ទៅ​ចូលរួម​ជាមួយ​ក្រុម​នៅ​ម៉ាឡេស៊ី ប៉ុន្តែ​នៅ​ទឹក​ដី​បរទេស​នោះ រូបគេ​ធ្វើ​មិន​បាន​ល្អ​នោះ​ទេ ​ទើប​ត្រូវ​គ្រូ​បង្វឹក​ដក​ចេញ​តែ​ម្ដង។ យ៉ាងណាមិញ ​ក្រោយ​ពី​ត្រលប់​មក​ដល់​កម្ពុជា​វិញ ​រូបគេ​ក៏​បាន​ចូលរួម​ជាមួយ​ក្រុម​វិសាខា​តែ​ម្ដង។ ដោយ​ឡែក​ខ្សែ​ការពារ សុខ សុវណ្ណ ​វិញ ​ក៏​បាន​ចូលរួម​ជាមួយ​ក្រុម​វិសាខា​ដែរ ​ក្រោយ​ពី​ចាកចេញ​ពី​បឹង​កេត៕

លោក ហុក សុចិត្រា អ្នកចាត់ការទូទៅក្រុមវិសាខា បានថ្លែងក្នុងសន្និសីទសារព័ត៌មានពីម្សិលមិញថា ដោយក្រុមខ្លួន គឺជាក្រុមថ្មី មិនទាន់មានលក្ខណៈសម្បត្តិល្អ ១០០% ដើម្បីប្រកួតប្រជែងក្រុមមានបទពិសោធន៍ច្រើនឆ្នាំ ពិតណាស់វិសាខា គឺត្រូវកីឡាករល្អៗ ដែលមានបទពិសោធន៍បន្ថែម ដូចជា កែវ សុខផេង និង សុខសុវណ្ណ ជាដើម ។ ប៉ុន្ដែការបើកទ្វារទទួលកីឡាករល្អៗបន្ថែម មិនបញ្ចប់ត្រឹមនេះឡើយ ដោយសារមហិច្ឆតារបស់ថ្នាក់ដឹកនាំ ចង់ជំរុញក្លឹបមួយនេះឲ្យមានការប្រកួតប្រជែងកាន់តែខ្លាំង និងទទួលបានលទ្ធផលល្អគ្រប់ការប្រកួត ។

អតីតគ្រូបង្វឹកក្រុមជម្រើសជាតិរូបនេះ បាននិយាយថា៖ «ពាក់ព័ន្ធរឿងហ្នឹង សំខាន់កីឡាករ មានន័យថា គាត់មានបទពិសោធន៍ខ្ពស់ គាត់លេងបានច្រើន គាត់លេងជម្រើសជាតិ និងលេងក្រៅប្រទេស ចឹងមានន័យថា គាត់មានបទពិសោធន៍ ។ ចឹងពាក់ព័ន្ធជាមួយនឹងការយកគាត់(សុខផេង)មក គឺយើងចាំបាច់ ក្លឹបយើងត្រូវការកីឡាករមានបទពិសោធន៍ អុីចឹងបើសិនមានកីឡាករល្អណាមកទៀត យើងនឹងទទួលយកទៀត ព្រោះយើងត្រូវការជំរុញក្លឹបឲ្យបានខ្លាំង ដោយសារក្លឹបយើងថ្មី» ។

សូមបញ្ជាក់ថា វិសាខា គឺជាក្រុមចំណូលថ្មី ប៉ុន្ដែពួកគេបានចាយលុយជាច្រើន ដើម្បីនាំយកកីឡាករមានបទពិសោធន៍ទៅជួយក្រុមខ្លួន ក្នុងនោះក្រៅពីកីឡាករដ៏មានសក្ដានុពល គឺកីឡាករកូរ៉េខាងជើង ៥រូប ពួកគេបាននាំយកកីឡាករល្អៗក្នុង ដូចជា រស់ សំអឿន, សាន គឹមហេង, ង៉យ ស្រ៊ីន និងអ្នកចាំទី កែវ សុខសិលា ជាដើម ដែលបានចូលរួមតាំងពីដើមរដូវកាល ខណៈ កែវ សុខផេង និង សុខ សុវណ្ណ ក៏បានត្រៀមខ្លួនជាស្រេច ដើម្បីជួយក្រុមថ្មីលើសមរភូមិវាលខ្មៅ ក្នុងការប្រកួតជើងទី២ និងពានសម្ដេចតេជោ ហ៊ុន សែន ផងដែរ ៕

photo of វិសាខា
កែវ សុខផេង និង​ សុខ សុវណ្ណា ទៅ​ចូល​រួម​​ក្លិប​ចំណូល​ថ្មី វិសាខា
photo of វិសាខា
កែវ សុខផេង និង​ សុខ សុវណ្ណា ទៅ​ចូល​រួម​​ក្លិប​ចំណូល​ថ្មី វិសាខា