ក្រសួង​ការពារ​ជាតិ ​បាន​ផ្លាស់​ប្ដូរ​រចនា​សម្ព័ន្ធ​សម្រាប់​រដូវ​កាល​ថ្មី​នេះ

ក្លិបបាល់ទាត់ក្រសួងការពារជាតិ បាន​ផ្លាស់​ប្ដូរ​រចនា​សម្ព័ន្ធ​របស់ក្រុមទាំងមូលសម្រាប់​រដូវ​កាល​ថ្មី​នេះ ដោយតែងតាំងលោក ភា សុភ័ត្រ្តា ឲ្យធ្វើជាគ្រូបង្គោលប្រចាំក្រុម ដើម្បីត្រៀមរដូវកាលថ្មីឆ្នាំ ២០១៨ ដែលនឹងចាប់ផ្តើមក្នុងពេលឆាប់ៗនេះ ចំណែក អតីតគ្រូបង្វឹក លោក ទេព ឡុងរចនា ឡើងទៅជាអ្នកចាត់ការទូទៅ ខណៈលោក ខូវ ឆាយ ទៅជាអគ្គលេខាធិការក្លិប។

ក្រោយពេលទទួលបានតំណែងថ្មីនេះ គ្រូបង្វឹកដែលកាន់សញ្ញាប័ត្រ License A  លោក ភា សុភ័ត្រា បាននិយាយថា លោកត្រៀមខ្លួនរួចជាស្រេច ក្នុងការប្រកួតប្រជែងថ្មីសម្រាប់លោក ខណៈក្រសួងការពារជាតិ គឺជាក្លិបដែលត្រូវបានគេចាត់ទុកថា ជាក្លិបដ៏ធំមួយក្នុងប្រទេសកម្ពុជា បច្ចុប្បន្ន។

«វា​ជា​កិត្តិយស​សម្រាប់​ខ្ញុំ​ដែល​បាន​ដឹក​នាំ​ក្រុម​ក្រសួង​ការពារ​ជាតិ ដែលខ្ញុំក្លាយជាគ្រូបង្វឹកក្នុងលីកកំពូលកម្ពុជា។ ខ្ញុំចំណាយពេលជាង ១០ឆ្នាំហើយ (២០០៧-២០១៧) ធើ្វជាគ្រូជំនួយ បន្ទាប់ពីខ្ញុំទទួលសញ្ញាប័ត្រគ្រូកម្រិត License A ក្នុងឆ្នាំ២០១២។ ខ្ញុំមានអារម្មណ៍អស្ចារ្យដែលក្លាយគ្រូបង្វឹក។ តួនាទីមួយនេះ ខ្ញុំនឹងត្រូវមានទំនួលខុសត្រូវខ្ពស់ជាងមុន។ យ៉ាងណាក្ដី វាជាពេលសម្រាប់ខ្ញុំ ដែលត្រូវជួបនឹងការប្រជែងថ្មី និងធើ្វការងារដើម្បីទទួលបានលទ្ធផល ​គោលដៅ​​ធំ​សម្រាប់​រដូវ​កាល​នេះ​គឺ​យក​ពាន​រង្វាន់​លីគ​កំពូល​កម្ពុជា​ឱ្យ​ក្រុម​ឬ​អន់​បំផុត​ក៏​អាច​រក្សា​ក្នុង​ក្នុង​ចំណាត់​ថ្នាក់​រង្វាន់​ពី​លេខ​២​ដល់​លេខ​៤​ដែរ» ៕

នេះជាការផ្លាស់ប្តូរ​រចនា​សម្ព័ន្ធ​របស់ក្រុមឡើងវិញរបស់ក្រុមក្រសួងការពារជាតិ ក្រោយពីការខកចិត្តត្រឹមជើងឯករង២រដូវការជាប់ៗគ្នាក្នុងពានរង្វាន់លីគកំពូលកម្ពុជា ខណះប្រកួតបើកឆាករដូវកាលថ្មីឆ្នាំ ២០១៨ ចុងសន្តាហ៍នេះ លោក ភា សុភ័ត្រា​ ត្រូវដឹកនាំក្រុមជួបក្រុមសូលទីឡូអង្គរ នៅវេលាម៉ោង ៣ : ៣០នាទីរសៀលថ្ងៃអាទិត្យ ទី៤ ខែមីនា ឆ្នាំ២០១៨ ៕