photo of អគ្គស្នងការដ្ឋាន​នគរបាលជាតិ
ក្រុម​បាល់ទាត់​អគ្គស្នងការដ្ឋាន​នគរបាលជាតិ (ប៉ូលីស)

ក្រុម​បាល់ទាត់​អគ្គស្នងការដ្ឋាន​នគរបាលជាតិ (ប៉ូលីស) បាន​សម្រេច​បន្ថែម​សមាជិក​ថ្មី ចំនួន២​រូប​ទៀត ​គឺ​ក្នុង​នោះ​មាន​កីឡាករ​ខ្មែរ​ម្នាក់ ​និង​បរទេស​ម្នាក់ ​មក​ចូលរួម​ក្នុង​ក្រុម ​នៅ​ជើង​ទី២ នៃ​ពានរង្វាន់​លីគ​កំពូលកម្ពុជា Metfone Cambodian League 2018 ដើម្បី​បំពេញ​បន្ថែម នៅ​ត្រង់​ចំណុច​ខ្វះខាត​របស់​ក្រុម​នា​ពេល​កន្លង​មក ។

លោក សារ៉េត ស៊ីដន គ្រូបង្គោលក្រុមអគ្គស្នងការដ្ឋាននគរបាលជាតិ ឲ្យដឹងថា អំឡុងទីផ្សារដោះដូរកីឡាករជុំទី២នៃក្របខណ្ឌ Metfone Cambodian League នេះ ក្រុមរបស់លោកបាននាំចូលសមាជិកថ្មីចំនួនពីររូប គឺអ្នកចាំទីក្នុងស្រុកមួយរូប និង ខ្សែប្រយុទ្ធកូរ៉េខាងត្បូងម្នាក់។

photo of សារ៉េត ស៊ីដន
លោក សារ៉េត ស៊ីដន គ្រូបង្គោលក្រុមអគ្គស្នងការដ្ឋាននគរបាលជាតិ

សម្រាប់អ្នកចាំទី គឺកីឡាករ សុះ ប្រុសហ៊ីម ដែលជាអតីតសមាជិកក្លិបបៀលប្រាយយូណាយធីត, វេស្ទើនភ្នំពេញ និង បានចាកចេញពីស៊ីម៉ាក់យូណាយធីត នៅដំណាច់រដូវកាល២០១៧កន្លងទៅ។
លោក ស៊ីដន រំពឹងថា ការចូលរួមពីសំណាក់កីឡាករជើងចាស់ខាងលើនឹងជួយបន្ថែមបទពិសោធដល់អ្នកចាំទី៣រូបដែលក្លិបមានស្រាប់។

ចំណែក ខ្សែប្រយុទ្ធកូរ៉េខាងត្បូងមានឈ្មោះថា Kim Dong-yoo ជាអតីតសមាជិកក្លិប Cheongju FC នៃក្របខណ្ឌ K-League 3 ហើយគេនឹងចូលជំនួសកីឡាកររួមជាតិរបស់គេម្នាក់ទៀត គឺ No Shang-min ដែលបានផ្លាស់ពីប៉ូលិសទៅក្លិប UiTM នៅលីគទី២ម៉ាឡេស៊ី។

សុះ ប្រុសហ៊ីម, Kim Dong-yoo

យោង​តាម​លិខិត​ផ្លូវការ ​ដែល​ចេញ​ដោយ​គណៈកម្មការ​រៀបចំការ​ប្រកួត ​ហៅ​កាត់​ថា​ CNCC បាន​បញ្ជាក់​ថា ​ការ​ដោះដូរ​កីឡាករ​ជើង​ទី២​នេះ ​​អាច​ធ្វើ​បាន​លើ​កីឡាករ​កម្ពុជា​៣រូប និង​កីឡាករ​បរទេស​៣​រូប ចាប់​ពី​ថ្ងៃ​ទី​១៥ ដល់​៣០​ខែ​មិថុនា។ តាម​គម្រោង​ការ​ប្រកួត​ជុំ​ទី២​ នឹង​ចាប់​ផ្ដើម​នៅ​ថ្ងៃ​ទី៣០ ខែ​មិថុនា ​ហើយ​កីឡាករ​ថ្មីៗ ​​ដែល​ក្លិបនីមួយៗ​ ជា​សមាជិក​ទាំង​១២​ក្រុម​បាន​ចុះ​បញ្ជី​លើក​ទី២​នេះ ​នឹង​ចូល​លេង​បាន ។