ខ្សែបម្រើ Fred របស់ក្លិប Manchester United បានចេញមុខ បដិសេធ រាល់ពាក្យចចាមអារ៉ាម ដែលថាគេចង់ចាកចេញពីក្លិប។

Fred
Fred

ជាការពិតណាស់ កាលពីថ្មីៗនេះ មានសារព័ត៌មានជាច្រើនបានចុះផ្សាយថា កីឡាករ Man Utd មួយចំនួន រួមទាំង Fred មានភាពមិនសប្បាយចិត្តជាមួយលោក Ralf Rangnick ដែលធ្វើឲ្យកីឡាករទាំងនោះ​ ចាប់ផ្តើមមានកូនចិត្តចង់ចាកចេញពីក្រុម។

ក៏ប៉ុន្តែយ៉ាងណាមិញ Fred បានបង្ហោះសារ និយាយសារភាពតាមត្រង់អំពីបញ្ហារបស់គេ បញ្ជាក់ប្រាប់អ្នកគាំទ្រក្នុងបណ្តាញសង្គមរបស់គេហើយ ថា ព័ត៌មានទាំងនេះ គឺមិនពិតទេ។

Fred បានសរសេរថា៖ “កាលពីប៉ុន្មានថ្ងៃនេះ ខ្ញុំឃើញព័ត៌មានក្លែងក្លាយច្រើនណាស់ ដែលចុះផ្សាយថា ខ្ញុំ និង មិត្តរួមក្រុមខ្ញុំចង់ចាកចេញពីក្លិប ក៏ប៉ុន្តែជាក់ស្តែងគ្មានទេ ព័ត៌មានទាំងនោះ គឺសុទ្ធតែពាក្យក្លែងក្លាយទាំងអស់ ព្រោះខ្ញុំរួមទាំងកីឡាករទាំងអស់នៅក្នុងក្រុមសុទ្ធតែរីករាយ និង ខំពុះពារទាំងអស់គ្នា ដើម្បីសម្រេចគោលបំណង ជួយក្រុមមួយនេះ ឲ្យបានជោគជ័យ”៕