ខ្សែប្រយុទ្ធឆ្នើម ចាន់ វឌ្ឍនាកា បានប្តូរចូលបង្ហាញខ្លួនឲ្យបឹងកេត កាលពីម្សិលមិញ ក្នុងជំនួបឈ្នះអាស៊ីអឺរ៉ុប ៤-០ តែពុំអាចស៊ុតបញ្ចូលទីបានឡើយ។ នេះជាការបង្ហាញខ្លួនលើកដំបូង ក្រោយវិលមកពីម៉ាឡេស៊ី។ វឌ្ឍនាកា នៅតែបង្ហាញភាពលេចធ្លោ ដោយព្យាយាមអូសបាល់កាត់ខ្សែការពារ AEU យ៉ាងច្រើន ប៉ុន្តែនៅមិនទាន់សម្រេចទីបាន។

ចាន់ វឌ្ឍនាកា
ចាន់ វឌ្ឍនាកា មិនទាន់រកគ្រាប់បាល់ដំបូងឲ្យ បឹងកេត នៅឡើយទេ!

ក្រុម​បឹងកេត បាន​យកឈ្នះ​ក្រុម​អាស៊ី​អឺរ៉ុប ៤-០ នៅ​ពហុកីឡដ្ឋាន​ជាតិ កាលពី​យប់​ថ្ងៃ​សៅរ៍ ដោយ​ក្នុង​នោះ​ខ្សែ​ប្រយុទ្ធ Oiboh Julius រក​បាន ២ គ្រាប់​នៅ​នាទី​ទី ២៦ និង​ទី ៤៤ ហើយ Maycon បាន​បន្ថែម ២ គ្រាប់​ទៀត នៅ​នាទី​ទី ៥៧ និង​ទី ៦៧ គឺ​ស្រប​ពេល​ដែល ចាន់ វឌ្ឍនាកា បាន​បង្ហាញ​ខ្លួន ត្រឹម​ជា​កីឡាករ​ជម្រើស​ទី ២ ក្នុង​រយៈពេល ៣០ នាទី​ចុង​ក្រោយ ហើយ​ការ​លេង​របស់​គេ ក៏​ហាក់​មិន​ទាន់​មាន​ការ​ស៊ី​ចង្វាក់​គ្នា ជាមួយ​មិត្ត​រួម​ក្រុម​ប៉ុន្មាន​ដែរ។

ចាន់ វឌ្ឍនាកា បានចូលលេងឲ្យក្រុមបឹងកេត ក្នុងនាមជាកីឡាករបម្រុងប៉ុណ្ណោះ។ វឌ្ឍនាកា ត្រូវបានដាក់ឲ្យចូលលេងនៅម្តុំនាទីទី៦០ ហើយការលេងរបស់គេ ហាក់មិនសូវស៊ីចង្វាក់ជាមួយសមាជិកក្រុមប៉ុន្មានឡើយ ឯគុណភាពកម្លាំងរបស់គេ ក៏មិនទាន់គ្រាប់គ្រាន់ផងដែរ។

ជុំវិញ​បញ្ហា​ស្ថានភាព​ប្រកួត​របស់ ចាន់ វឌ្ឍនាកា នេះ លោក ហៅ សុជាតិ គ្រូបង្វឹក​ក្រុម​បឹងកេត បាន​ប្រាប់​កាល​ពី​ម្សិលមិញ​ថា៖ «មក​ដល់​ពេល​នេះ ទម្រង់​លេង​របស់ ចាន់ វឌ្ឍនាកា នៅ​តែ​ល្អ​ដដែល ប៉ុន្តែ​គាត់​នៅ​ខ្វះ​កម្លាំង បន្តិច ព្រោះ​គាត់​ទើប​ហ្វឹកហាត់​ជាមួយ​ក្រុម បាន ១ សប្តាហ៍​ទេ អ៊ីចឹង​កម្លាំង​របស់​គាត់ មិន​ទាន់​ពេញ​ល្អ​ទេ»។

លោក ហៅ សុជាតិ បាន​បន្ថែមថា៖ «យើង​នៅ​មិនទាន់​អាច​និយាយបាន​ថា វឌ្ឍនាកា នឹង មាន​កម្លាំង​ពេញ អាច​លេង​បាន ១០០ ភាគរយ ក្នុង​ការ​ប្រកួត ទី​ប៉ុន្មាន​ឲ្យ​ប្រាកដ​នោះ​ទេ គឺ​យើង​ត្រូវ​តាម​ដាន​ពី​កម្លាំង​របស់​គាត់ ការ​ឲ្យ​គាត់​លេង​យល់​ចិត្ត​ជាមួយ​ក្រុម និង​ឲ្យ​គាត់​យល់​ពី​ទម្រង់​រៀបចំ​របស់​យើង​ទៀត ព្រោះ​គាត់​ពេល​នេះ​ដូចជា​កម្លាំង​ថ្មី​មួយ ផង​ដែរ ប៉ុន្តែ ចាន់ វឌ្ឍនាកា ជា​កីឡាករ​ល្អ​មួយ​រូប អ៊ីចឹង​ខ្ញុំ​គិត​ថា ប្រហែល​ជា​ប្រើ​ពេល​មិន​យូរ​ប៉ុន្មាន​ទេ គឺ​ត្រឹម​ការ​ប្រកួត​ទី ៣ ឬ​ទី ៤ ក្នុង​ជើង​ទី ២ នេះ គាត់​នឹង​លេង​បាន​ពេញ​ហើយ»។

បឹងកេត
កីឡាករ Julius និង Maycon ឲ្យ បឹងកេត ម្នាក់២គ្រាប់

យ៉ាងណាក៏ដោយ លទ្ធផលនេះ បានជួយបឹងកេតបន្តឈរកំពូលតារាង ខណៈក្រុមលេខ២ណាហ្គាវ៉ើល ក៏បំបាក់ព្រះខ័នរាជស្វាយរៀង ៤-០ ដេញពីក្រោយផងដែរ។