photo of ចាន់ វឌ្ឍនាកា
ចាន់ វឌ្ឍនាកា ក្នុង​សន្និសិទសារព័ត៌មាន​ផ្លូវការ​នៅ​រសៀល​ថ្ងៃ​សៅរ៍

នៅទីបំផុត កីឡាករ ចាន់ វឌ្ឍនាកា សមាជិក​ក្រុម​ជម្រើស​ជាតិ​កម្ពុជា ដែល​ទើប​តែ​ផ្តាច់កិច្ចសន្យា​ជាមួយ​ក្លិប Pahang FA សមាជិក​ពានរង្វាន់​លីគ​កំពូល​ម៉ាឡេស៊ី នា​ពេល​​កន្លង​ទៅ នៅ​ពេល​នេះ​បាន​សម្រេច​ចិត្ត​ចូលរួម​ជាមួយ​ក្រុម​ចាស់​បឹងកេត វិញ​ហើយ ​បើ​ទោះបី​ជា​មាន​ការ​ចចារ​ពី​ក្លិប​បរទេស​មួយ​ចំនួន​ក៏​ដោយ។

ជាមួយគ្នានេះ លោកស្រីប្រធានក្លឹបក៏បានបញ្ជាក់ដែរថា វត្តមានរបស់ វឌ្ឍនាកា គឺសញ្ញាវិជ្ជមានមួយសម្រាប់ក្លឹបស្របពេលដែលបេះដូងរបស់កីឡាកររូបនេះនៅជាមួយបឹងកេតជានិច្ច ។ លោក បែ មករា អ្នកចាត់ការទូទៅក្លឹប បានបន្ថែមថា សម្រាប់ជើងទី២ នៃលីគកំពូលកម្ពុជានេះ CV 11 នឹងបន្តជួយក្លឹបបឹងកេត ប៉ុន្តែក្លឹបក៏នឹងផ្តល់ឱកាសឱ្យរូបគេចូលរួមជាមួយនឹងបណ្តាក្លឹបបរទេសផងដែរនោះនាពេលខាងមុខ ។

ថ្លែងក្នុងសន្និសីទសារព័ត៌មានរបស់ក្លឹបបឹងកេត នារសៀលថ្ងៃសៅរ៍នេះ ចាន់ វឌ្ឍនាកា បាននិយាយថា” មាន​ហេតុ​ផល៣យ៉ាង​ដែល​ខ្ញុំ​សម្រេច​មក​បន្ត​អាជីព​នៅ​កម្ពុជា​វិញ​ព្រោះ​​ ទី១.ខ្ញុំ​មើល​ឃើញ​សក្ដានុពល​របស់​លីគ​កំពូល​កម្ពុជា បច្ចុប្បន្ន​ មាន​ក្រុម​ដែល​អាច​ប្រកួត​ប្រជែង​គ្នា​ច្រើន ទី២.ខ្ញុំ​ឃើញ​ចក្ខុវិស័យ​ និង​មាន​ឆន្ទៈខ្ពស់​របស់​ថ្នាក់ដឹកនាំ​ក្នុង​ការ​ដឹកនាំ​ក្លិប និង​ទី៣.គឺក្រុមទាំងមូល​ មាន​ឆន្ទៈ​ចង់​ឈ្នះលីគ​កំពូល​កម្ពុជា​ ដែល​ធ្វើ​ឲ្យ​ខ្ញុំមាន​ឆន្ទៈ​ចង់បាន​​លេង​នៅ​កម្ពុជាវិញ”។

គួរបញ្ជាក់ដែរថា ការចូលរួមជាផ្លូវការនេះ បានបញ្ចប់ពាក្យចចាមអារ៉ាមកន្លងមក ថារូបគេនឹងទៅលេងនៅក្រៅស្រុក ខណៈដែលកីឡាករដែលដើមកំណើតមកពីខេត្តកំពតរូបនេះធ្លាប់បានបញ្ជាក់ថា ខ្លួនកំពុងចរចាជាមួយក្លឹបបរទេស ហើយខិតជិតដល់ដំណាក់កាលព្រមព្រៀងហើយ ប៉ុន្ដែមិនទាន់បង្ហើបពីឈ្មោះក្លឹប ឬប្រទេស ដែលខ្លួនត្រូវបន្ដអាជីពក្រៅស្រុកនោះទេ ហើយរូបគេក៏បានសង្កត់ធ្ងន់ថា សម្រាប់ជើងទី២ ក្នុងឆ្នាំ២០១៨ ខ្លួននឹងបន្ដលេងក្រៅស្រុក មិនទាន់វិលត្រឡប់មកចូលរួមជាមួយក្លឹបនៃលីគកំពូលកម្ពុជានោះឡើយ ៕