ប៉ះគ្នាល្ងាចនេះ ទាំងជម្រើសជាតិកម្ពុជា និង អា​ហ្វ​ហ្គា​នី​ស្ថាន សុទ្ធតែចង់ឈ្នះរៀងខ្លួន

ក្រុមបាល់ទាត់ជម្រើសជាតិកម្ពុជា នឹងត្រូវធ្វើការប្រកួតជាមួយនឹង ជម្រើសជាតិអាហ្វហ្គានីស្ថាន ក្នុងជំនួបបិទពូល C  នៃពានរង្វាន់ជើងឯកទ្វិបអាសុី AFC Asian Cup 2019 នៅម៉ោង ៦ ល្ងាចនេះ (ម៉ោងនៅកម្ពុជា) នៅពហុកីឡដ្ឋាន Pamir Stadium ក្នុងទីក្រុង Dushanbe ប្រទេសតាហ្ស៊ីគីស្ថាន។

តាមរយៈការប្រកួត ៥លើកកន្លងមកនេះ ក្រុមកម្ពុជា និងអាហ្វហ្គានីស្ថាន មានត្រឹម ៣ពិន្ទុដូចគ្នា ដោយក្នុងនោះ អាហ្វហ្គានីស្ថាន បានស្មើ៣ និងចាញ់ ២ប្រកួត ខណៈកម្ពុជា បានយកឈ្នះអាហ្គានីស្ថាន ១-០ ក្នុងការប្រកួតជើងទី១ ប៉ុន្តែបានចាញ់ក្រុមហ្សកដានី និងក្រុមវៀតណាម ទាំង ២ជើងដូចគ្នា។

សម្រាប់​ជើង​ទី​ពីរ​នេះ​ជា​ការ​ប្រកួត​បង្គ្រប់​កិច្ច​របស់​ក្រុម​ទាំង​ពីរ​ដោយ​សារ​ធ្លាក់​​ដូច​គ្នា​​ ប៉ុន្តែ​វា​ជា​ការ​ប្រកួត​សំខាន់​ដដែល​សម្រាប់​លោក​គ្រូ​ ប្រាក់ សុវណ្ណារ៉ា ហើយលោកបានថ្លែងក្នុងសន្និសីទកាសែត នៅប្រទេសតាហ្ស៊ីគីស្ថាន កាលពីម្សិលមិញថា ” បើទោះបីការប្រកួតនេះមិនមានសារះសំខាន់សម្រាប់យើងក្នុងការប្រកួតប្រជែងរកកៅអីដើម្បីឡើងទៅជុំបន្ទាប់ក៏ពិតមែន ប៉ុន្តែវាមានសារសំខាន់សម្រាប់ក្រុមយើង ជាពិសេសដើម្បីបង្កើនចំនាត់ថ្នាក់ក្នុងតារាងពិភពលោក (FIFA World Ranking) ដូច្នេះនេះគឺជាអ្វីដែលសំខាន់បំផុត។”

ចំណែក​លោក​ Otto Pfister គ្រូ​បង្វឹក​ជម្រើស​ជាតិ​អាហ្វហ្គានីស្ថាន​បាន​និយាយ​ក្នុង​សន្និសីទ​កាសែត​ថា​ “ទោះបីយើងមានកីឡាករបរទេសមានបទពិសោធន៍នៅក្រៅប្រទេសច្រើនក៏ដោយ តែយើងបានប្រកួតចាញ់កាលពីជើងទីមួយ ដូចនេះជាយុទ្ធនាការដ៏លំបាកមួយសម្រាប់ពួកយើង ហើយយើងនឹងប្រកួតលើកចុងក្រោយជាមួយក្រុមកម្ពុជា នៅថ្ងៃស្អែក (ថ្ងៃអង្គារនេះ) ដោយយើងសង្ឃឹមថា យើងនឹងធ្វើបានល្អ ដើម្បីបង្ហាញពីការលេងដ៏ពេញចិត្តមួយ ទៅដល់អ្នកគាំទ្រ”

គួរបញ្ជាក់ថា នេះ​ជា​ការ​ប្រកួត​បង្គ្រប់​កិច្ច​សម្រាប់​ក្រុម​ទាំង​ពីរ​ដែលប្រកួត​​វេលា​ម៉ោង​៦ល្ងាច ​នៅ​ទឹក​ដី​កណ្តាល​ តាជីគីស្ថាន។ ចំណែក​ក្រុម​វៀតណាម និង​ហ្សកដានី​បាន​ឡើង​ទៅ​វគ្គ​បន្ត ប៉ុន្តែ​ត្រូវ​ប្រកួត​បញ្ចប់​ភារកិច្ច​ក្នុង​ពូល​នេះ​ដែរ​៕