កីឡាករ​ជម្រើស​ជាតិ​កម្ពុជា ប្រាក់ មុន្នី​ឧ​ត្ត​ម បាន​ចុះកិច្ចសន្យា​លេង​ឲ្យ​ក្លិប​ក្របខណ្ឌ​លី​គ​កំពូល​ម៉ាឡេស៊ី Negeri Sembilan F.A ដោយ​ចុះ​កុងត្រា ១​រដូវ​កាល (២០១៨-២០១៩)​ ក្នុង​លក្ខខណ្ឌ​ខ្ចី​ជើង​ពី​ក្រុម​ព្រះខ័ន​រាជ​ស្វាយរៀង ក្រោយ​មានការ​ទាក់ទង​ភ្លាមៗពី​សំណាក់​ក្រុម​ចំណូល​ថ្មី​ នៃ​ក្រប​ខណ្ឌ​លី​ហ្គ​កំពូល​ម៉ាឡេស៊ី​មួយ​នេះ និង​មាន​ជំរុញគាំទ្រ​បន្ថែម​ពី​ថ្នាក់ដឹកនាំ​ក្រុម​ជើងឯក​ពានរង្វាន់​សម្ដេច​តេ​ជោ ហ៊ុន សែន ឆ្នាំ​២០១៧​នេះ​ផង​ដែរ

photo of ប្រាក់ មុន្នី​ឧ​ត្ត​ម
ប្រាក់ មុន្នី​ឧ​ត្ត​ម ផ្ទេរ​ទៅលេង​នៅ​ម៉ាឡេស៊ី

កិច្ច​សន្យា​ជាមួយ​ក្រុម Negeri Sembilan កាលពី​ចុង​សប្ដាហ៍​កន្លងទៅ ប្រាក់ មុន្នី​ឧ​ត្ត​ម បាន​ឲ្យ​ដឹង​ពី​ប្រទេស​ម៉ាឡេស៊ី​ថា កុងត្រា​ខាងលើគឺ​បាន​កើតឡើង​ភ្លាមៗ ក្រោម​មានការ​ទាក់ទង​ពី​ថ្នាក់ដឹកនាំ​ក្រុម Negeri Sembilan ក្នុង​រយៈពេល​ខ្លី​បំផុត។ យ៉ាងណាមិញ​កុងត្រា​នេះគ្រាន់តែ​ជា​លក្ខណៈ​ខ្ចី​ជើង​ប៉ុណ្ណោះ ខណៈ​ខ្លួន​មិនបាន​ចាកចេញ ឬ​ផុត​កុងត្រា​ជាមួយ​ក្រុម​ព្រះខ័ន​រាជ​ស្វាយ​រៀង​នោះ​ទេ។ ផ្ទុយទៅវិញ​ថ្នាក់ដឹកនាំ​ក្រុមព្រះ​ខ័ន​រាជ​ស្វាយរៀង ថែមទាំង​ជំរុញ​រូបគេ​ឲ្យ​ទៅលេង​នៅ​ម៉ាឡេស៊ី​ទៀត​ផង។ កីឡាករ​ទើប​ឈ្នះ​ពាន​កីឡាករ​ល្អ​ជាងគេប្រចាំ​ពាន​សម្ដេច​តេ​ជោ ហ៊ុន សែន ឆ្នាំ​២០១៧ បាន​បន្ថែម​ថា ជាមួយ​នឹង​ការសម្រេចចិត្ត​ទៅលេង​នៅ​ម៉ាឡេស៊ី ជាមួយ​កីឡាករ​មិត្ត​រួម​ជាតិ ចាន់ វឌ្ឍនាកា​, កែវ សុខ​ផេង និង ធា​រី ចន្ថា​ប៊ី​ន នេះ​ដែរ ខ្លួន​នឹង​ទទួល​បាន​អត្ថប្រយោជន៍​ជាច្រើន ក្នុង​នោះ​ក៏​ទទួល​បាន​ប្រាក់ខែ​ក្បែរ ១​ម៉ឺន​ដុល្លារ​ផង​ដែរ​

photo of ប្រាក់ មុន្នី​ឧ​ត្ត​ម
ប្រាក់ មុន្នី​ឧ​ត្ត​ម ផ្ទេរ​ទៅលេង​នៅ​ម៉ាឡេស៊ី

​សូម​បញ្ជាក់​ថា ប្រធាន​ក្រុម​ព្រះខ័ន​រាជ​ស្វាយរៀងរូបនេះគឺជា​កីឡាករ​កម្ពុ​ជាទី​៤ ហើយ ដែល​បាន​ចុះ​កុងត្រា​ជាមួយក្រុម​សមាជិក​លី​ហ្គ​កំពូល​ម៉ាឡេស៊ី​នា​រដូវ​កាល​ថ្មី​នេះ ខណៈ​កីឡាករ​មិត្ត​រួម​ជាតិ ៣​រូប​ផ្សេងទៀតគឺ​មាន​កីឡាករ ចាន់ វឌ្ឍនាកា លេង​ឲ្យ​ក្លឹប Pahang FA, កីឡាករ កែវ សុខ​ផេង លេង​ឲ្យ​ក្លឹប PKNP FC និង​កីឡាករ ធា​រី ចន្ថា​ប៊ី​ន លេង​ឲ្យ​ក្លឹប Terengganu FC៕

គួរបញ្ជាក់​ថា ក្រោយ​ការចាកចេញ​របស់​ប្រធាន​ក្រុម​រូបនេះ ព្រះខ័ន​រាជ​ស្វាយរៀង​បាន​នាំចូល​កីឡាករ​ថ្មី​ចំនួន​ពីររូប​ដើម្បី​ជំនួស​កៅអី​របស់គេ​ត្រៀម​ប្រជែង​ជើងឯក​នៅ​ឆ្នាំនេះ​។ កីឡាករ​ទាំងពីរ​នោះ​រួមមាន​ខ្សែប្រយុទ្ធ Shane Booysen មកពី​ភ្នំពេញ​ក្រោ​ន និង​កីឡាករ សួន សុវណ្ណ មកពី​វេ​ស្ទើ​ន​ភ្នំពេញ​៕