ប្រធានក្លិប Barcelona លោក Joan Laporta បានលើកឡើងថា លោកពិតជាសប្បាយរីករាយណាស់ប្រសិនបើ Lionel Messi ទាក់ទងមកលោកអំពីការចង់វិលត្រឡប់មកកាន់កីឡដ្ឋាន Camp Nou វិញ។

Lionel Messi នឹង Joan Laporta
Lionel Messi នឹង Joan Laporta

ជាការពិតណាស់ Messi បានចាកចេញពី Barcelona ដើម្បីផ្លាស់ទៅកាន់ PSG ដោយគ្មានតម្លៃខ្លួនកាលពីដើមរដូវកាល ប៉ុន្តែ មកទល់ពេលនេះគ្រប់យ៉ាងហាក់ផ្ទុយស្រឡះពីការរំពឹងទុក បន្ទាប់ពីរូបគេត្រូវបានអ្នកគាំទ្រស្រែកជេរប្រមាថខ្លាំងៗក្រោយមិនអាចជួយក្រុមឡើងទៅកាន់វគ្គបន្តនៃក្របខណ្ឌ Champions League បាន។

មូលហេតុនេះហើយក៏កើតចេញជាពាក្យចចាមអារ៉ាម ថា កីឡាករសញ្ជាតិអាហ្សង់ទីនខាងលើ អាចនឹងត្រឡប់មកកាន់ទឹកដីអេស្ប៉ាញវិញក្រោយបញ្ចប់រដូវកាលនេះ។

នៅក្នុងកិច្ចសម្ភាសមួយជាមួយអ្នកកាសែត ដែលបានសាកសួរលោក Laporta ថាសាកស្រមៃមើលប្រសិនបើថ្ងៃណាមួយ Messi ទាក់ទងមកលោក ថា គេចង់ត្រឡប់មកកាន់ Barcelona វិញណាស់ ដូច្នេះតើលោកនឹងឆ្លើយតបទៅវិញយ៉ាងម៉េច?

លោក Laporta បានឆ្លើយទៅវិញថា៖ “តោះយើងនិយាយគ្នា Messi។ ខ្ញុំពិតជាសប្បាយចិត្តរីករាយខ្លាំងណាស់ប្រសិនបើវាកើតឡើងមែន”៕