ការប្រកួត​វគ្គ​ជម្រុះ World Cup 2022 ដំណាក់កាល​ទី​២ តំបន់​អាស៊ី សម្រាប់​ពូ​ល C គឺ​នឹង​បន្ត​ធ្វើ​ការប្រកួត​ទី​៣ នៅ​ថ្ងៃទី ១០ ខែ តុលា ឆ្នាំ​២០១៩​ខាងមុខនេះ ដោយមាន ២​ប្រកួត គឺ អ៊ីរ៉ង់ ជួប កម្ពុជា និង អ៊ីរ៉ាក់ ជួប ហុងកុង ខណៈដែល បា​រ៉ែ​ន មិនមាន​ការប្រកួត​ឡើយ​។

ជម្រើសជាតិកម្ពុជា
ជម្រើសជាតិកម្ពុជា

ស្ថិតិ ៥​ប្រកួត​ចុងក្រោយ​របស់​អ៊ីរ៉ង់ មុន​ប៉ះ​កម្ពុជា មានដូចជា​៖ អ៊ីរ៉ង់ បាន​ប្រកួត​ឈ្នះ ជម្រើស​ជាតិចិន នៅ​ថ្ងៃទី ២៤ ខែ មករា ឆ្នាំ​២០១៩ ក្នុង​ពានរង្វាន់ AFC Asian Cup 2019 និង​ក្រោយមក​ចាញ់ ជប៉ុន ៣-០ នៅ​ថ្ងៃទី ២៨ ខែ មករា ។ នៅ​ថ្ងៃទី ៦ ខែ មិថុនា ឆ្នាំ​២០១៩ ពួកគេ បាន​ប្រកួត​មិត្តភាព​ឈ្នះ ក្រុម​ជម្រើសជាតិ​ស៊ី​រី លទ្ធផល ៥-០ និង ស្មើ​ជាមួយ កូរ៉េខាងត្បូង ១-១ នៅ​ថ្ងៃទី ១១ ខែ មិថុនា ។ ប្រកួត​ទី​៥ របស់​អ៊ីរ៉ង់ គឺ​បាន​យកឈ្នះ​លើ ហុងកុង ២-០ ក្នុង​វគ្គ​ជម្រុះ​ពូ​ល C នេះ​តែម្តង ដោយ​ទទួលបាន ៣​ពិន្ទុ​ដំបូង​ផងដែរ​។

រីឯ​ស្ថិតិ ៥​ប្រកួត​ចុងក្រោយ​របស់​កម្ពុជា មុន​ប៉ះ​អ៊ីរ៉ង់ វិញ​មាន​ដូច​ជា នៅ​ថ្ងៃ​ទី៩ ខែមីនា ឆ្នាំ​២០១៩ កម្ពុជា បាន​បើកឆាក​ប្រកួត​ប្រចាំឆ្នាំ​ថ្មី​របស់​ខ្លួន ដោយ​ចាញ់​ក្រុម​ជម្រើសជាតិ​បង់​ក្លា​ដែ​ស ក្នុង​ជំនួប​មិត្តភាព លទ្ធផល ១-០ និង​ក្រោយមក​ប្រកួត​ឈ្នះ ប៉ា​គី​ស្ថាន ក្នុង​វគ្គ​ជម្រុះ​ដំណាក់កាល​ទី​១ ពានរង្វាន់ FIFA World Cup 2022 ក្នុង​ទឹកដី ២-០ និង​ក្រៅ​ទឹកដី ២-១ ។ ២​ប្រកួត​ចុងក្រោយ​របស់​កម្ពុជា គឺ​ក្នុង​ពូ​ល C នេះ​តែម្តង ដោយ​ស្មើគ្នា​ជាមួយ ហុងកុង ១-១ កាលពី​ថ្ងៃទី ៥ ខែ កញ្ញា និង ចាញ់​បា​រ៉ែ​ន ១-០ នៅ​ប្រាំ​ថ្ងៃ​បន្ទាប់។

ស្ថិតិ​ប្រកួត​រវាង​ក្រុម​ទាំងពីរ ដែល​ធ្លាប់​ជួបគ្នា​ក្នុង​ប្រវត្តិសាស្ត្រ​បាល់ទាត់​គឺមាន​តែ ២​លើក​ប៉ុណ្ណោះ ពោលគឺ​នៅ​ឆ្នាំ ១៩៧២ ក្នុងការ​ប្រកួត​ជម្រុះ AFC Asian Cup ក្នុងប្រទេស​ថៃ ដែល​កាលនោះ កម្ពុជា ចាញ់​ទាំងពីរ​ប្រកួត ពោលគឺ​លើក​ទី​១ ចាញ់ ២-០ និង​លើក​ទី​២ ចាញ់ ២-១។

បច្ចុប្បន្ន កម្ពុជា កំពុង​ប្រមូលផ្តុំ​ហ្វឹកហាត់​ជាមួយ​កីឡាករ​បឋម​សរុប ២៦​រូប ក្រោម​ការ​បង្វឹក​ផ្ទាល់​ដោយ​គ្រូ​បង្គោល​លោក Felix Dalmas មុន​ចេញដំណើរ​ទៅកាន់​ទីក្រុង Tehran ប្រទេស​អ៊ីរ៉ង់ នៅ​ថ្ងៃទី ៥ ខាងមុខ៕