​ក្រុម​ដាណឺម៉ាក​ត​វ៉ា​ខ្លាំង ចំពោះ​អាជ្ញាកណ្ដាល​ដែល​បាន​ផ្ដល់​បាល់​ប៉េណាល់​ទី​ទៅ​ឱ្យ​ក្រុម​អង់គ្លេស​កាល​ពី​យប់មិញ​នេះ ​ធ្វើ​ឱ្យ​អង់គ្លេស​មាន​ឱកាស​ឈ្នះ​ក្នុង​លទ្ធផល ២-១។

អាជ្ញាកណ្ដាល Danny Makkelie
អាជ្ញាកណ្ដាល Danny Makkelie

​ដោយ​សូម្បី​តែ​លោក Arsene Wenger ​អតីត​អ្នក​ចាត់ការ​ក្រុម Arsenal ​និង​បច្ចុប្បន្ន​កំពុង​បម្រើ​ការងារ​ឱ្យ FIFA ​ក៏​មើល​ឃើញ​ថា​បាល់​នេះ​មិន​សម​ឱ្យ​ប៉េណាល់ទី​ដែរ។ ​លោក​បាន​ដាក់​សំនួរ​ទៅ​កាន់​អាជ្ញាកណ្ដាល Danny Makkelie ​នៅ​យប់មិញ ​ហេតុ​អ្វី​មិន​ទៅ​មើល​អេក្រង់ ត្រួត​ពិនិត្យ VAR ​បន្ដិច​ដើម្បី​កាត់​សេចក្ដី​ឱ្យ​ច្បាស់ ​ព្រោះ​នេះ​ជា​ការ​ប្រកួត​សំខាន់​វគ្គ​ពាក់​កណ្ដាល​ផ្ដាច់ព្រ័ត្រ​ផង។ ​មួយ​វិញ​ទៀត ​១​គ្រាប់​ប៉េណាល់ទី​នេះ​ក៏​ជា​គ្រាប់​បាល់​កាត់​សេចក្ដី​នៃ​ការ​ប្រកួត​ផង​ដែរ។

​ស្រប​ពេល​ឃើញ​ភាព​អ​សកម្ម​នេះ​ហើយ ​អ្នក​គាំទ្រ​ក៏​បាន​លើក​យក​រឿង​លោក Makkelie ​កាត់​សេចក្ដី​ប្រកួត​ព័រទុយហ្គាល់​ជាមួយ​សែប​ផង​ដែរ។ ​ដោយ​កាល​នោះ ​គ្រាប់​បាល់​របស់ Ronaldo ​បាន​ចូល​ទី​ទៅ​ហើយ ប៉ុន្តែ​អាជ្ញាកណ្ដាល​រូប​នេះ​មិន​ផ្ដល់​ឱ្យ​ទៅ​វិញ។ ដោយ​ពេល​នោះ សំអាង​ថា​មិន​មាន​បច្ចេកវិទ្យា VAR ​ដើម្បី​ពិនិត្យ។ ​ក្រោយ​ពី​ចប់​ការ​ប្រកួត​នោះ ​ក្រុម​អាជ្ញាកណ្ដាល​ក៏​ទទួល​ស្គាល់​កំហុស ​ហើយ​សុំ​ទោស​មក​ខាង​ក្រុម​ព័រទុយហ្គាល់​វិញ​ដែរ៕