អុញនោះ! Juventus នឹងលក់កីឡាកររូបនេះចេញ ខណៈត្រូវបានក្លិបគីឡូធ្ងន់មួយចាប់អារម្មណ៍

ក្លិបសេះបង្កង់ Juventus ត្រូវគេរាយការណ៍ថាមានបំណងបើកលក់ខ្សែបម្រើ Weston McKennie នៅរដូវក្ដៅនេះ ខណៈរូបគេទទួលបានការចាប់អារម្មណ៍ពីម្ចាស់ជើង​ឯក Bundesliga ក្លិប Bayern Munich នៅក្នុងរយៈពេលប៉ុន្មានខែចុងក្រោយនេះ។

យោងតាមគេហទំព័រអ៊ីតាលី Calciomercatoweb.it បានឲ្យដឹងថាក្លិប Juventus នឹងព្រមលក់កីឡាករវ័យក្មេង Weston McKennie ប្រសិនបើក្លិប Bayern Munich អាចបំពេញតាមការស្នើសុំនៅក្នុងតម្លៃ ៣០លានអឺរ៉ូ (ឬប្រមាណ ៣៥លានដុល្លារអាមេរិក)។

ហើយដោយសារតែស្ថានភាពហិរញ្ញវត្ថដ៏លំបាករបស់ក្លិប Juventus ដូច្នេះនឹងអាចបង្ខំឲ្យពួកគេចែកផ្លូវជាមួយកីឡាករវ័យ២២ឆ្នាំរូបនេះ មុនពេលទីផ្សារដោះដូរកីឡាករដែលនឹងបិទបញ្ចប់នៅថ្ងៃទី៣១ ខែសីហាខាងមុខ។

គួររម្លឹកថា Weston McKennie បានផ្ទេរពីក្លិប ​Schalke នៅឯក្របខណ្ឌ Bundesliga មកចូលរួមជាមួយក្លិប Juventus នៅក្នុងឆ្នាំ២០២០ ហើយកីឡាករសញ្ជាតិអាមេរិករូបនេះ បង្ហាញខ្លួនបាន ៣១ប្រកួត និងរកបាន ៥គ្រាប់ សម្រាប់ក្លិប កាលពីរដូវកាលមុន៕