ខ្សែ​ការពារ​ស្ដាំ Dani Alves បាន​ប្រកាស​ថា គេ​នឹង​ចាកចេញ​ពី​ Barcelona ជា​លើក​ទី​ពីរ ក្រោយ​ត្រលប់​ចូលរួម​ជាមួយ​ក្លឹប​កាល​ពី​ឆ្នាំ​មុន។

Dani Alves
Dani Alves

កីឡាករ​វ័យ​៣៩​ឆ្នាំ​​បាន​ត្រលប់​ចូលរួម​ជាមួយ Barca កាល​ពី​ខែ​វិច្ឆិកា ៥​ឆ្នាំ​ក្រោយ​ចាកចេញ​ពី​កីឡដ្ឋាន Nou Camp ផ្ទេរ​ទៅ​កាន់ Juventus។ ការ​​មក​លេង​ឲ្យ Barcelona ដោយ​សារ​តែ Alves ចង់​ជួយ​ក្រុម​ចាស់​​របស់​ខ្លួន​ដែល​កំពុង​ស្ថិត​ក្នុង​ពេលវេលា​ដ៏​លំបាក និង​ចង់​មាន​ឱកាស​លេង​មុន World Cup ២០២២ មក​ដល់។

តាម​ពិត​ទៅ​ក្រោយ​បញ្ចប់​ការ​ប្រកួត​ចុង​ក្រោយ​នៅ La Liga កីឡាករ​សញ្ជាតិ​ប្រេស៊ីល​ខាង​លើ​​មាន​បំណង​ចង់​បន្ត​​នៅ​ជាមួយ​ក្លឹប ប៉ុន្តែ Barcelona មិន​ពិចារណា​បន្ត​កុងត្រា​ថ្មី​ឲ្យ​គេ​ឡើយ។ សរុប​ទាំង​អស់ Alves បាន​បង្ហាញ​ខ្លួន​ឲ្យ Barca បាន​៤០៧​ប្រកួត និង​ឈ្នះ​ពាន​ La Liga ៦​ដង។

​​​Alves បច្ចុប្បន្ន​កំពុង​សម្រាក​លំហែកាយ​ បន្ទាប់​ពី​បំពេញ​​ភារកិច្ច​ឲ្យ​ជម្រើសជាតិ​ប្រេស៊ីល ហើយ​ពេល​នេះ​​គេ​ក៏​ដឹង​ខ្លួន​ថា​ ត្រូវ​រក​ក្លឹប​ថ្មី​លេង​សម្រាប់​រដូវ​កាល​ថ្មី​ផង​ដែរ។ អតីត​កីឡាករ​របស់​ក្លឹប Sao Paulo ក៏​បាន​អរគុណ​ដល់ Barca ដែល​បាន​​ផ្ដល់​ឱកាស​​សម្រាប់​ខ្លួន​ក្នុង​ការ​ត្រលប់​មក​កាន់​ក្លឹប​​ជា​លើក​ទី​ពីរ៕