ក្លិបអ្នកមានបុណ្យ Barcelona បានកំណត់គោលដៅនាំចូលខ្សែការពារស្លាបឆ្វេងរបស់ក្លិបមាន់ខ្នាយមាស Tottenham Hotspur កីឡាករ Sergio Reguilon ដោយគ្រោងផ្ដល់កីឡាករ Memphis Depay ជាថ្នូរដោះដូរ។

Memphis Depay នឹង Sergio Reguilon
Memphis Depay នឹង Sergio Reguilon

បើយោងតាមការចុះផ្សាយរបស់កាសែតអេស្ប៉ាញ Sport ក្លិបយក្សតំបន់កាតាឡាន់ខាងលើ កំពុងសម្លឹងរកមើលខ្សែកាពារស្លាបឆ្វេង មកត្រៀមបំពេញតួនាទីជំនួសកីឡាករ Jordi Alba ដែលមានវ័យ៣២ឆ្នាំ។ ជាមួយគ្នានេះ Reguilon ជាបេក្ខភាពមួយរូប ដែល Barca ចង់បានបំផុត ដើម្បីជំនួស Alba ។

តាមពិតទៅ ដំបូងឡើយ Barca មានបំណងចង់បានខ្សែការពារ របស់ក្លិប Valencia កីឡាករ Jose Gaya ឯណោះទេ ប៉ុន្តែកីឡាកររូបនេះ មិនមានបំណងចាកចេញពីក្លិបឡើយ ដោយកំពុងពិភាក្សាបន្តកុងត្រាថ្មីជាមួយ Valencia ។

 

បន្ថែមពីនេះ បើតាមប្រភពដដែល ដើម្បីជាជំនួយក្នុងការចរចា Barca គ្រោងយក Depay ទៅធ្វើជាស្ពាន ដើម្បីសម្រេចកិច្ចព្រមព្រៀង នាំយក Reguilon មកកាន់ទឹកដី Camp Nou ក៏ព្រោះថា ខ្សែប្រយុទ្ធសញ្ជាតិហូឡង់ រួមជាមួយខ្សែការពារ Clement Lenglet ធ្លាប់ជាគោលដៅ ដែល​ Spurs ចង់បានកាលពីមុន ។

 

គួបញ្ជាក់ដែរថា សម្រាប់រដូវកាលនេះ Reguilon តែងត្រូវបានបង្ហាញខ្លួនជាញឹកញាប់ឲ្យ Spurs តួយ៉ាងគេចូលលេងបាន២៨ប្រកួតមកហើយគិតគ្រប់ព្រឹត្តិការណ៍ទាំងអស់ ក្នុងនោះ គេស៊ុតបាន២គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបាន៣ដង៕