Chelsea បានដំឡើងប្រាក់ ២០ម៉ឺនផោនក្នុងមួយសប្ដាហ៍ក៏ Rudiger មិនព្រមបន្តកុងត្រាដែល

អនាគតរបស់ខ្សែការពារ Antonio Rudiger ជាមួយក្លិប Chelsea នៅតែស្ថិតក្នុងភាពមិនច្បាស់លាស់ ក៏ព្រោះតែការចរចាបន្តកុងត្រាថ្មីបន្តបរាជ័យ។

បើយោងតាមកាសែត Sportsmail បានឲ្យដឹងថា កិច្ចចរចារវាង Chelsea ជាមួយនឹងខ្សែកាពារសញ្ជាតិអាល្លឺម៉ង់ខាងលើ នៅតែបន្ត ដោយជើងឯកពាន UCL រដូវកាលមុនមួយនេះ ចង់ចងជើង​ Rudiger ឲ្យនៅទឹកដី​ Stamford Bridge បន្តឲ្យបានផុតកុងត្រារបស់គេ បច្ចុប្បន្នដែលផុតកំណត់ត្រឹមរដូវក្ដៅខាងមុខនេះ។

ក្នុងកុងត្រាបច្ចុប្បន្ន Rudiger ទទួលបានថ្លៃឈ្នួលនឿយហត់ ១០ម៉ឺនផោន (ឬប្រមាណ ១៣ម៉ឺនដុល្លារកន្លះ) ក្នុងមួយសប្ដាហ៍។ ជាមួយគ្នានេះ បើតាមប្រភពដដែល កិច្ចចរចាចុងក្រោយបង្អស់ Chelsea បានដាក់សំណើ ប្រាក់ពលកម្មក្បែរ២០ម៉ឺនផោន ក្នុងមួយសប្ដាហ៍ ប៉ុន្តែ​នៅតែមិនអាចថ្ពក់ចិត្ត ខ្សែការពារវ័យ២៨ឆ្នាំ ឲ្យទទួលយក។

យ៉ាងណាមិញ ​Chelsea មិនទាន់បោះបង់នោះទេ ដោយក្លិបយក្សអង់គ្លេសមួយនេះ ទំនងនឹងព្យាយាមបន្តស្វះស្វែងរកវិធីសាស្ត្រ ដើម្បីសម្រេចកុងត្រាថ្មីជាមួយ Rudiger ក៏ព្រោះតែជើងក្រោមរូបនេះ ស្ថិតក្នុងគម្រោងប្រើប្រាស់របស់លោកគ្រូ Thomas Tuchel។

គួរបញ្ជាក់ដែរថា Rudiger ជាគោលដៅនាំចូលរបស់ក្លិបធំៗចំនួន២នៅតំបន់អឺរ៉ុប ពោលរួមមានក្លិបយក្សបារាំង Paris Saint-Germain និង ក្លិបអធិរាជស Real Madrid ដោយក្លិបទាំងពីរនេះ សុទ្ធតែធ្លាប់ដាក់សំណើយក Rudiger កាលពីទីផ្សារខែមករា ៕