ខ្សែការពារស្លាបឆ្វេងរបស់ក្លិប Bayern Munich កីឡាករ Alphonso Davies សឹងមិនគួរឲ្យជឿ ថាហេតុអ្វី ក្លិបបិសាចក្រហម Manchester United មើលរំលងខ្សែប្រយុទ្ធ Cristiano Ronaldo ​បែរទៅឲ្យស្លាកប្រធានក្រុមទៅកាន់ខ្សែការពារ Harry Maguire ទៅវិញ។

Cristiano Ronaldo,Alphonso Davies នឹង Harry Maguire
Cristiano Ronaldo,Alphonso Davies នឹង Harry Maguire

Maguire បានទទួលរងការរិះគន់យ៉ាងច្រើន ពីសំណាក់អ្នកគាំទ្រ នៅរដូវកាលនេះ ជុំវិញការបង្ហាញទម្រង់លេងមិនសូវល្អ​ អមជាមួយការបង្ហាញកំហុសជារឿយៗរបស់គេ ខណៈបច្ចុប្បន្ន Man United ក៏កំពុងយ៉ាប់យ៉ឺន ដោយកំពុងឈរលេខ៧ ក្នុងលីគ។

ជាមួយគ្នានេះ ដោយសារទម្រង់លេងមិនល្អ​របស់ Maguire បានធ្វើឲ្យអ្នកគាំទ្រជាច្រើន តែងមិនពេញចិត្តនឹងកីឡាករសញ្ជាតិអង់គ្លេសរូបនេះ ដែលដើរតួរជាប្រធានក្រុម។ យ៉ាងណាមិញ មិនត្រឹមតែអ្នកគាំទ្រទេ សូម្បីតែតារាឆ្នើមក្រុមយក្សអាល្លឺម៉ង់ Bayern Munich កីឡាករ Davies ក៏មិនយល់ថាហេតុអីក្លិបបិសាចក្រហម ផ្ដល់តំណែងប្រធានក្រុមទៅ Maguire ដែរ។

ដោយ Davies បាននិយាយកំឡុងពេលឡាយ ហ្គេម ​FIFA 22 ថា៖ “តើអ្នករាល់គ្នា សាកស្រមៃបានទេ​។ Ronaldo ជាកីឡាករដ៏ឆ្នើមបំផុតម្នាក់ ដល់ពេលសួរថាអ្នកណាជាប្រធានក្រុមរបស់គាត់? Harry Maguire មែនទេ? ខ្ញុំមិនបដិសេធ Harry Maguire ទេ ប៉ុន្តែ​ Ronaldo គាត់គួរតែជាអ្នកពាក់ស្លាកប្រធានក្រុម”៕