photo of Eden Hazard
Eden Hazard ស៊ុត ២គ្រាប់​ជួយ​ បែល​ហ្ស៊ិក យក​ឈ្នះ​រុស្ស៊ី ៣-១វគ្គ​ជម្រុះ Euro 2020

ការប្រកួតវគ្គជម្រុះពានរង្វាន់ Euro 2020 ក្រុមជម្រើសជាតិបែលហ្ស៊ិក បានយកឈ្នះក្រុមជម្រើស ជាតិរុស្ស៊ី ក្នុងលទ្ធផលផ្លូវការ ៣-១ គ្រាដែលកីឡាករខ្សែប្រយុទ្ធឆ្នើម Eden Hazard រកបាន ២គ្រាប់ម្នាក់ឯងនា រាត្រីថ្ងៃទី២២ ខែមីនា ឆ្នាំ២០១៩។

សម្រាប់ការប្រកួត ក្រុមម្ចាស់ផ្ទះបិសាចក្រហមបែលហ្ស៊ិក រកបាន ៣គ្រាប់ដោយកីឡាករខ្សែបម្រើ Youri Tielemans នាទីទី១៤ ខណៈខ្សែប្រយុទ្ធឆ្នើមមកពីក្លឹបតោខៀវ Chelsea, Eden Hazard រកបាន ២គ្រាប់ម្នាក់ឯង នៅនាទី៤៥ និងនាទី៨៨ និង១គ្រាប់របស់ក្រុមភ្ញៀវខ្លាឃ្មុំទឹកកករុស្ស៊ី រកបានដោយកីឡាករ Denis Cheryshev នៅនាទី១៦។

Eden Hazard
Eden Hazard

ក្រុមដែលស្ថិតក្រោមការដឹកនាំរបស់គ្រូបង្វឹកសញ្ជាតិអេស្ប៉ាញ Roberto Martinez រកបាន ៣ពិន្ទុក្នុងទឹកដីនៅ ថ្ងៃបើកឆាកជម្រុះ Euro 2020 ដើម្បីឡើងទៅឈរលេខ៣ បណ្តោះអាសន្នប្រចាំពូល I ក្នុងចំណោម សាយប្រឺស និងកាហ្សាក់ស្ថានដែលសុទ្ធសឹងទទួលបានជ័យជម្នះដូចគ្នា៕