ក្លិបសេះបង្កង់ Juventus នឹងបើកភ្លើងខៀវអនុញ្ញាតឲ្យ ខ្សែការពារ Matthijs de Ligt ចាកចេញពីក្លិបខណៈដែលក្លិប Barcelona និង Paris Saint-Germain កំពុងចង់បានគេ។

Matthijs de Ligt
Matthijs de Ligt

ប៉ុន្តែក្លិបនឹងឲ្យ de Ligt ចាកចេញលុះត្រាណាតែមានក្លិបផ្សេងដាក់សំណើទឹកប្រាក់ចាប់ពី ១០០លានអឺរ៉ូ(ស្មើនឹងប្រមាណ ១០៨.២ លានដុល្លារ) នេះបើយោងតាមការរាយការណ៍ពី Calciomercato ។

កុងត្រារបស់កីឡាករសញ្ជាតិហូឡង់រូបនេះនឹងផុតកំណត់នៅឆ្នាំ២០២៤ បន្ទាប់ពីផ្ទេរពី Ajax មកកាន់ទឹកដីក្រុង Turin កាលឆ្នាំ២០១៩ ដោយក្នុងនោះភាគីលោក Max Allegri ចង់បានគេមកជំនួសខ្សែការពារ Giorgio Chiellini ដែលមានវ័យជ្រេទៅហើយ។

យ៉ាងណាមិញ Juventus នៅតែចង់រក្សាទុក Matthijs de Ligt តែបើសិនគេចង់ចាកចេញនោះក្លិបនឹងមិនឃាត់ឃាំងឡើយ។ គួរបញ្ជាក់ផងដែរតម្លៃផ្ដាច់កុងត្រារបស់ de Ligt គឺមានដល់ទៅ ១២០លានអឺរ៉ូ(ស្មើនឹងប្រមាណ ១២៩.៩ លានដុល្លារ)ឯណោះ៕