ពិត​ជា​រឿង​ភ្ញាក់ផ្អើល​មួយ​ក្នុង​ការ​ប្រកួត​នៅ​យប់មិញ​នេះ ​ក្រោយ​ពី​លោក Ronald Koeman ​បាន​ដាក់​ឱ្យ​ខ្សែ​ការពារ Gerard Pique ​ទៅ​លេង​នៅ​តំបន់​ប្រយុទ្ធ​វិញ​ដើម្បី​ជួយ​រក​គ្រាប់​បាល់។

Gerard Pique
Gerard Pique

​ក្នុង​ការ​ប្រកួត​ពាន​រង្វាន់ La Liga ​នៅ​យប់មិញ ​ក្រុម​អ្នក​មាន​បុណ្យ FC Barcelona ​លេង​បាន​ត្រឹម​ស្មើ​ជាមួយ​ក្រុម Granada ​ក្នុង​លទ្ធផល ១-១ ​ប៉ុណ្ណោះ។ ខណៈ​ដែល​ក្រុម​ភ្ញៀវ Granada ​ជា​អ្នក​រក​គ្រាប់​បាល់​នាំ​មុខ​បាន​មុន​ថែម​ទៀត​នៅ​នាទី​ទី​២ ​ហើយ​នៅ​ចុង​ម៉ោង​ទើប​ក្រុម​អ្នក​មាន​បុណ្យ​អាច​រក​គ្រាប់​បាល់​តាម​ស្មើ ​១-១ ​នោះ​បាន​។

​អ្វី​ដែល​កាន់​តែ​ចាប់​អារម្មណ៍​ក្នុង​ការ​ប្រកួត​នេះ​ទៀត គឺ​លោក Ronald Koeman ​អ្នក​ចាត់ការ​ក្រុម Barcelona ​បាន​ប្រាប់​ទៅ​ខ្សែ​ការពារ Pique ​ឱ្យ​ឡើង​ទៅ​លេង​ប្រយុទ្ធ​វិញ ​ដោយ​ចាប់​ដៃ​គូ​ជាមួយ​កីឡាករ​ចំណូល​ថ្មី De Jong ​នៅ​តំបន់​ខាង​លើ។ លោក ​បាន​អះអាង​ថា​កីឡាករ​ដែល​មាន​នៅ​ពេល​បច្ចុប្បន្ន​នេះ ​មិន​អាច​ធ្វើ​អ្វី​ក្រៅ​ពី​លើក​បាល់​ចូល​តំបន់​គ្រោះ​ថ្នាក់​ខាង​គេ​នោះ​ទេ។ ដូច្នេះ​ហើយ ​យក​អ្នក​ជំនាញ​ខាង​តែត​ឡើង​ទៅ​លើ​ជា​ជម្រើស​មួយ៕