លោក Pep Guardiola កំពុងពិចារណាបន្ថែមតួនាទី ឲ្យកូនក្រុមលោកកីឡាករ​ Fernandinho មានតួនាទីជាគ្រូបង្វឹកក្រុមបន្ថែមទៀត។

Fernandinho នឹង Pep Guardiola
Fernandinho នឹង Pep Guardiola

ជាការពិតណាស់ Fernandinho បានផ្លាស់ពីក្លិប Shakhtar Donetsk មកចូលរួមជាមួយក្លិប Man City ចាប់តាំងពីឆ្នាំ ២០១៣​ មកម្ល៉េះហើយ Fernandinho បានរួមចំណែកជួយក្រុមឈ្នះពានជាច្រើនដូចជា ពានលីគកំពូល Premier League ចំនួន​ ៤ដង ពាន League Cup ចំនួន​ ៦ដងពាន FA Cup ចំនួន១ដង។

យ៉ាងណាមិញ​ កុងត្រារបស់ Fernandinho និងត្រូវផុតនៅរដូវក្តៅខាងមុខនេះហើយ ហើយអនាគតរបស់គេកំពុងតែនៅមានភាពស្រពិចស្រពិលនៅឡើយ។

បើយោងតាមសារកាសែត Torcedores បានចុះផ្សាយថា ប្រធានក្លិប Man City កំពុងឲ្យលោក Pep ព្យាយាមចងជើង Fernandinho ដោយលោកយល់ឃើញថា កីឡាកររូបនេះ មានមនសិការស័ក្តិសមជាអ្នកដឹកនាំក្រុមមួយនេះ ហើយលោកនឹងបន្តកុងត្រាថ្មីឲ្យគេ ព្រមទាំងផ្តល់តួនាទីឲ្យគេជួយបង្វឹកក្រុមផងដែរ នៅរដូវកាល ២០២២-២៣ ខាងមុខនេះ៕