photo of Pep Guardiola
លោក Pep Guardiola អ្នកចាត់ការ Manchester City

លោក Pep Guardiola អ្នកចាត់ការ Manchester City និយាយថា​ត្រូវទាក់ទាញអ្នកគាំទ្រដោយបាល់ Champions League បន្ទាប់ពីក្លិបធ្វើការបោះឆ្នោតស្ទង់មតិ ហើយចេញចម្លើយថាអ្នកគាំទ្រចង់ឈ្នះពាន Premier League ជាង Champions League។

Manchester City នឹងបើកយុទ្ធនាការពានទ្វីបអឺរ៉ុបក្នុងផ្ទះជាលើកទី៩ជាប់គ្នា ទល់នឹង Dinamo Zagreb នៅម៉ោង២យប់ថ្ងៃអង្គារទី១ខែតុលាឆ្នាំ២០១៩នេះ។

មុនការប្រកួតមកដល់ លោក Pep និយាយថា៖ «ខ្ញុំដឹងថាសម្រាប់អ្នកគាំទ្រ Premier League គឺរំភើបជាងគេ។ ប៉ុន្តែពាននេះ(UCL)ក៏ល្អដែរ។ ពួកយើងនឹងព្យាយាមទាក់ទាញអ្នកគាំទ្ររបស់យើងហើយនិយាយថា[យើងអាចធ្វើបាន]»។

Manchester City
ក្រុម​ Manchester City

«ពួកយើងបានធ្វើការបោះឆ្នោតស្ទង់មតិ ហើយមនុស្សម្នាចង់ឈ្នះពាន Premier League ជាង Champions League។ ខ្ញុំមិនដឹងថាហេតុអ្វីទេ តែវាជាការពិតសម្រាប់ក្លិបយើង ហើយយើងត្រូវតែទទួលយក។ ខ្ញុំគិតថាដោយសារតែពីមុនមក យើងមិនបានលេងពាននេះ។ ពួកយើងពីមុននៅផ្ទះ ផឹកស្រាក្នុងតៀម មើលការប្រកួតរបស់ Liverpool និង Manchester United»។

«ពួកយើងចង់ឈ្នះពាននេះ តែបើយើងមិនឈ្នះ ខ្ញុំនឹងមិនសម្លាប់ខ្លួននោះទេ។ Barcelona ជាក្លិបក្នុងបេះដូងខ្ញុំ។ ពួកគេបានឈ្នះពាននេះក្នុងឆ្នាំ១៩៩២ តែពួកគេបានចាប់កំណើតរាប់សិបឆ្នាំមុនឈ្នះនោះ។ ខ្ញុំមានអារម្មណ៍ថាយើងខិតកាន់តែកៀកនឹងការឈ្នះពាននេះ តែពាននេះជាពានកម្រិតខ្ពស់»។

Manchester City

មានការរំពឹងទុកថាអ្នកគាំទ្រ៤៨,០០០ទៅ៥០,០០០នាក់នឹងចូលទស្សនាផ្ទាល់ការប្រកួតយប់នេះ ខណៈសំបុត្រនៅតែសល់សម្រាប់លក់នៅឡើយ ដោយតម្លៃចាប់ពី២០ផោនឡើងទៅសម្រាប់មនុស្សពេញវ័យ។

Man City ធ្លាប់ធ្វើបានល្អបំផុតក្នុងពានទ្វីបអឺរ៉ុបនេះដោយឡើងដល់វគ្គ៤ក្រុមចុងក្រោយក្នុងឆ្នាំ២០១៦ក្រោមការដឹកនាំរបស់លោក Manuel Pellegrini ថ្វីបើពួកគេត្រួតត្រាពានក្នុងស្រុកនិងរកបានពិន្ទុយ៉ាងលើសលប់ក្នុង Premier League ក្ដី៕