ក្លិបមាន់ខ្នាយមាស Tottenham Hotspur បានឈានដល់កិច្ចព្រមព្រៀងជាមួយក្លិប PSV Eindhoven ក្នុងកាចុះកុងត្រាយកខ្សែបម្រើស្លាប Steven Bergwijn នេះបើយោងតាមការចុះផ្សាយរបស់កាសែត De Telegraaf ។

photo of Steven Bergwijn
ខ្សែបម្រើស្លាប Steven Bergwijn

ការចរចា ដើម្បី​ផ្ទេរកីឡាករSteven កាន់តែមមាញឹកខ្លាំងឡើងកាលពីចុងសប្តាហ៍​ ហើយ​កីឡាករ​សញ្ជាតិហូឡង់​រូបនេះ​ត្រូវ​បាន​ដកចេញពីក្រុមជម្រើស​របស់​ក្លឹប PSVសម្រាប់ការ​ប្រកួតស្មើ​១-១ជាមួយ​ក្រុម Twente បន្ទាប់ពី​ត្រូ​វបាន​អនុញាតឲ្យ​ធ្វើ​ដំណើរទៅទីក្រុងឡុងដ៍​ ដើម្បី​សម្រេច​កិច្ច​ព្រមព្រៀងផ្ទេរ​នេះ។

ក្លិបទាំងពីរ បានជួបពិភាក្សាគ្នាកាលពីព្រឹកថ្ងៃច័ន្ទ លុះដល់ពេលល្ងាច ទើបឈានដល់កិច្ចព្រមព្រៀង។ ក្នុងការចរចានោះដែរ ក្រុម PSV នឹងទទួលបានលើស ៣០លានអឺរ៉ូ (ឬប្រមាណ៣៣លានដុល្លារ) សម្រាប់ខ្សែបម្រើវ័យ២២ឆ្នាំ។

អ្នកចាត់ការក្លឹប Spurs លោកJose Mourinhoចាប់ផ្តើម​ពង្រឹង​ក្រុម​របស់​លោកឡើងវិញ បន្ទាប់ពី​ក្លឹប​ Spurs បានព្រមព្រៀង​លក់​កីឡាករ Christian Eriksenក្នុងតម្លៃ​១៧​លានផោនឲ្យ​ក្លឹប Inter Milan ។

ការសម្រេចកិច្ច​ព្រមព្រៀង​ផ្ទេរ​នេះ​នឹង​បញ្ចប់​ការ​ចាប់អារម្មណ៍​លើ​ Steven  ដែល​អាចលេងក្នុងតំណែង​ផ្សេងៗនៅតំបន់ប្រយុទ្ធនោះពីសំណាក់ក្លឹបផ្សេងៗទៀត៕