លោក Thomas Tuchel បាន​និយាយ​ថា លោក​នឹង​ដឹក​កីឡាករ Chelsea ទៅ​ប្រកួត​ជាមួយ​​រថយន្ត​៧​​កៅអី ប្រសិន​បើ​ក្លឹប​មិន​មាន​លទ្ធភាព​ជិះ​យន្តហោះ។

Thomas Tuchel
Thomas Tuchel

កាល​ពី​សប្ដាហ៍​មុន​ ម្ចាស់​ក្លឹប Chelsea លោក Roman Abramovich ត្រូវ​​បាន​រដ្ឋាភិបាល​អង់គ្លេស​ដាក់​ទណ្ឌកម្ម​ ដោយ​សារ​តែ​លោក​មាន​ទាក់ទង​ជាមួយ​ប្រធានាធិបតី Vladimir Putin។ ក្លឹប Chelsea ពេល​នេះ​ត្រូវ​​ជាប់​បម្រាម​ជា​ច្រើន​​ដូច​ជា​ ការ​ផ្ដល់​កុងត្រា​ថ្មី​ឲ្យ​កីឡាករ និង​ទិញ​កីឡាករ​ថ្មី​ចូល​ជា​ដើម។

Chelsea ក៏​មិន​អាច​លក់​សំបុត្រ​​ឲ្យ​អ្នក​ចូល​ទស្សនា​ចូល​មើល​បាន​ទៀត​ផង។ អ្វី​ដែល​ពួក​គេ​អាច​រក​លុយ​បាន​គឺ​ការ​លក់​​អាហារ​និង​ភេសជ្ជៈ​​នៅ​ក្នុង​ការ​ប្រកួត​ក្នុង​ដី។ តាម​ដំណឹង​ Chelsea នឹង​មិន​មាន​​លទ្ធភាព​ជិះ​យន្ត​ហោះ​ឯក​ជន​ ហើយ​ប្រហែល​ជា​ត្រូវ​​​​ស្វែង​រក​ជិះ​យន្តហោះ​ក្នុង​កម្រិត​ថវិកា​ដើម្បី​ទៅ​លេង​ជាមួយ Lille។