photo of U16 នារី​កម្ពុជា
U16 នារី​កម្ពុជា

មន្ដ្រី​សហព័ន្ធ​កីឡាបាល់ទាត់​កម្ពុជា បាន​ឲ្យ​ដឹងថា ក្រុមបាល់ទាត់​ជម្រើសជាតិ​នារី​អាយុ​ក្រោម ១៦​ឆ្នាំ​កម្ពុជា នឹងត្រូវ​ចូលរួម​ប្រកួត​ក្នុង​ព្រឹត្តិការណ៍​បាល់ទាត់​នារី​អាយុ​ក្រោម ១៦​ឆ្នាំ​ជ្រើសរើស​ជើងឯក​អាស៊ីអាគ្នេយ៍ AFF U16 Girls’ Championship 2018 នា​ដើមខែ​ឧសភា​ខាងមុខ នៅ​ប្រទេស​ឥណ្ឌូនេស៊ី ដែល​នឹង​ចាប់ផ្ដើម​ការប្រកួត​ពីថ្ងៃ​ទី​០១ រហូតដល់​ថ្ងៃទី​១៤ ខែឧសភា​ឆ្នាំ​២០១៨ ។​
​ការប្រកួត​ពាន​ខាងលើ​មាន​ក្រុមបាល់ទាត់​នារី ៩​ក្រុម​ក្នុង​តំបន់​អាស៊ាន​ចូលរួម និង​បែង​ចែកជា​២​ពូក ក្នុងនោះ​U16 នារី​កម្ពុជា ស្ថិតក្នុង​ពូ​ល​B ជាមួយ​ក្រុម​ជើង​ខ្លាំង​ថៃ ឥណ្ឌូនេស៊ី និង​ក្រុមបាល់ទាត់​នារី​ឡាវ ខណៈ​ពូ​ល​A គឺមាន​វៀតណាម មី​យ៉ាន់​ម៉ា សិង្ហ​បុរី ហ្វីលីពីន និង​ម៉ាឡេស៊ី ។​
​សូមជម្រាប់ថា សម្រាប់​ការប្រកួត​បើកឆាក U16 នារី​កម្ពុជា ត្រូវ​ប៉ះ U16​នារី​ឡាវ នៅ​ថ្ងៃទី​០២ ខែឧសភា មុន​បន្ដ​ជួប​ក្រុម​ម្ចាស់ផ្ទះ​ឥណ្ឌូនេស៊ី នា​ថ្ងៃទី​០៤ ខែឧសភា បន្ទាប់មក​ទើប​ជួប​ក្រុម​ខ្លាំង​ថៃ នៅ​ថ្ងៃទី​០៦ ខែឧសភា​ខាងមុខ៕