លោក​ Xavi គ្រូបង្គោល​ក្លឹប​ Barcelona បាន​និយាយ​នៅ​ក្នុង​កិច្ច​សម្ភាសន៍​ក្រោយ​ឈ្នះ​ក្លឹប​ Real Madrid នៅ​ទីលាន​ Santiago Bernabeu យប់​មិញ​នេះ​ថា​ លោក​មិន​រំពឹង​ក្រុម​របស់​លោក​ធ្វើ​បាន​ល្អ​ខ្លាំង​ រហូត​ដល់​ថ្នាក់​យកឈ្នះ​ក្នុង​លទ្ធផល​ ៤ ទល់នឹង ០ បែប​នេះ​នោះ​ទេ​។

Xavi Hernandez
Xavi Hernandez

លោក​ Xavi បាន​និយាយ​ថា​៖” យើង​ខិត​ខំ​ខ្លាំង​ណាស់​ រហូត​ដល់​ក្រុម​របស់​យើង​ទទួល​បាន​លទ្ធផល​បែប​នេះ​។ ប៉ុន្តែ​យើង​មិន​រំពឹង​ថា​យើង​ធ្វើ​បាន​ល្អ​ខ្លាំង​រហូត​ទទួល​បាន​លទ្ធផល​បែប​នេះ​ក្នុង​ទីលាន​របស់​ពួក​គេ​​នោះ​ទេ​ “។

លោក​បាន​បន្ត​ថា​៖” យ៉ាង​ណា​យើង​រំពឹង​នឹង​ជួប​ការ​ប្រកួត​ប្រជែង​បែប​តឹង​តែង​ខ្លាំង​ទៀត​។ ខ្ញុំ​សប្បាយ​ចិត្ត​មែន​ទែន​នឹង​លទ្ធផល​ និង​ការ​ប្រកួត​អស់​ទាំង​នេះ​ “។

នៅ​ក្នុង​រដូវកាល​នេះ​ Barca បាន​ប៉ះ​នឹង​ Real Madrid ចំនួន ៣ដង​ហើយ​ ដោយ​ចាញ់​២ដង​ និង​ឈ្នះ​១ដង​ក្នុង​យប់​មិញ​នេះ​។ នៅ​ក្នុង​ពេល​​ថ្មីៗ​នេះ​ Barca ត្រូវ​បានសង្កេត​ឃើញ​ថាឡើង​ទម្រង់​លេង​ខ្លាំង​ ដោយ​នៅ​ខណៈ​នេះ​កំពុង​ស្ថិត​ក្នុង​ចំណាត់​ថ្នាក់​ទី​៣ មាន​ ៥៤ពិន្ទុ​ ក្នុង​ការ​ប្រកួត​ La Liga រី​ឯ​ Real Madrid ជា​ក្រុម​នាំ​មុខ​មាន​ ៦៦ពិន្ទុ​៕